Pse Turistët nga Kosova po Braktisin Durrësin këtë Sezon

Në plazhin e Durrësit, numri i turistëve nga Kosova është rrudhur ndjeshëm këtë sezon për shkak të rritjes së çmimeve, forcimit të lekut kundrejt euros dhe mundësive më të mëdha për të udhëtuar drejt vendeve të tjera.

Në rrugën “Pavarësia”, që përshkon për gati 4 kilometra plazhin e Durrësit, shqiptarët e Kosovës nuk janë më turistët e përhershëm. Rruga e mori emrin pas shpalljes së Pavarësisë së Kosovës në vitin 2008 dhe njihet sot për hotelet dhe lokalet e shumta në vijë paralele me detin Adriatik.

“Në fillim të gjithë vinin për pushime në Durrës dhe një pjesë takonin edhe familjarët durrsakë që i pritën në vitin e vështirë 1999. Atëherë e quanin turizëm patriotik,” kujton Cen Hysniu, pronari i njërit prej lokaleve të zonës.